પ્રકાશન તારીખ: 03-02-2026

માઉન્ટેન ટનલ (MT-6) ની લંબાઈ 454 મીટર અને પહોળાઈ 14.4 મીટર છે

પાલઘરમાં લગભગ એક મહિનામાં બે માઉન્ટેન ટનલ બ્રેકથ્રૂ પ્રાપ્ત

રેલવે, માહિતી અને પ્રસારણ તથા ઇલેક્ટ્રોનિક્સ અને માહિતી પ્રૌદ્યોગિકી મંત્રી શ્રી અશ્વિની વૈષ્ણવએ બુલેટ ટ્રેન પ્રોજેક્ટમાં મહત્વપૂર્ણ સિદ્ધિની જાહેરાત કરી છે. મહારાષ્ટ્રના પાલઘરમાં બીજી માઉન્ટેન ટનલનું બ્રેકથ્રૂ સફળતાપૂર્વક પૂર્ણ થયું છે. આ ટનલ 454 મીટર લાંબી અને 14.4 મીટર પહોળી છે, જેમાં મુંબઈ-અમદાવાદ બુલેટ ટ્રેન પ્રોજેક્ટ માટે અપ અને ડાઉન બંને ટ્રેક રહેશે.

આ પાલઘર જિલ્લામાં એક મહિનાની અંદર બીજો માઉન્ટેન ટનલ બ્રેકથ્રૂ છે. પહેલો MT-5 ટનલ બ્રેકથ્રૂ 2 જાન્યુઆરી 2026ના રોજ સાફાલે નજીક થયો હતો.

માઉન્ટેન ટનલ (MT-6) નું ખોદકામ બંને છેડેથી ન્યૂ ઓસ્ટ્રિયન ટનલિંગ મેથડ (NATM) દ્વારા કરવામાં આવ્યું, જે ડ્રિલ અને નિયંત્રિત બ્લાસ્ટિંગ પર આધારિત અદ્યતન તકનિક છે. આ ટનલનું કામ 12 મહિનામાં પૂર્ણ થયું. ટનલ બ્રેકથ્રૂ એ એક મહત્વપૂર્ણ ઇજનેરી તબક્કો છે જ્યાં બંને તરફથી ખોદકામ કરતી ટીમો વચ્ચે મળે છે અને સતત માર્ગ બને છે.

કેન્દ્રીય મંત્રી અશ્વિની વૈષ્ણવે સમગ્ર હાઇ-સ્પીડ રેલ ટીમને અભિનંદન આપ્યા. તેમણે કહ્યું કે ટીમની કાર્યગતિએ દેશમાં નવો વિશ્વાસ જગાવ્યો છે. આ પ્રોજેક્ટ નવી તકનીકો અને નવાચારના કારણે વૈશ્વિક સ્તરે ધ્યાન આકર્ષી રહ્યો છે. તેમણે વધુમાં જણાવ્યું કે આ પ્રોજેક્ટમાં ઉપયોગમાં લેવાતી અનેક આધુનિક મશીનો ભારતમાં જ બનાવવામાં આવી રહી છે.

કેન્દ્રીય મંત્રીએ જણાવ્યું કે ગુજરાત વિભાગમાં બુલેટ ટ્રેન પ્રોજેક્ટ આગામી વર્ષે વ્યાવસાયિક કામગીરી શરૂ કરવાની સંભાવના છે. તેમણે ઉમેર્યું કે 2028 સુધીમાં સેવા ઠાણે સુધી અને 2029 સુધીમાં મુંબઈ સુધી વિસ્તરવાની અપેક્ષા છે.

પાલઘર લોકસભા ક્ષેત્રના સાંસદ ડૉ. હેમંત વિષ્ણુ સાવરા પણ આ પ્રસંગે હાજર હતા. તેમણે આ સિદ્ધિ બદલ કેન્દ્રીય મંત્રીનો આભાર વ્યક્ત કર્યો અને જણાવ્યું કે પાલઘર જિલ્લામાં રેલવે પ્રોજેક્ટ્સ દ્વારા ઝડપી વિકાસ થઈ રહ્યો છે. જેમાં હાઇ-સ્પીડ રેલ કોરિડોર, ડેડિકેટેડ ફ્રેઇટ કોરિડોર (DFC) અને આવનારો વધવન પોર્ટ સમાવેશ થાય છે.

ન્યૂ ઓસ્ટ્રિયન ટનલિંગ મેથડ (NATM) જટિલ ભૂગર્ભ પરિસ્થિતિઓમાં ખૂબ જ ઉપયોગી છે. તેમાં ભારે મશીનોની ઓછી જરૂર પડે છે અને શોટક્રિટ, રૉક બોલ્ટ અને લેટિસ ગર્ડર્સ દ્વારા રિયલ-ટાઈમ એડજસ્ટમેન્ટ શક્ય બને છે.

ટનલની અંદર કામદારોની સુરક્ષા માટે વિવિધ જિયોટેકનિકલ સાધનો, રિયલ-ટાઈમ મોનિટરિંગ, અગ્નિ સુરક્ષા વ્યવસ્થા, યોગ્ય વેન્ટિલેશન અને નિયંત્રિત પ્રવેશ સુવિધાઓ ઉપલબ્ધ કરવામાં આવી હતી.

મહારાષ્ટ્રમાં પ્રોજેક્ટનું કામ અનેક મોરચાઓ પર ઝડપથી આગળ વધી રહ્યું છે. વૈતરણા નદી પરનો સૌથી લાંબો પુલ પિયર સ્તર સુધી પહોંચી ગયો છે, જ્યારે ઉલ્હાસ અને જગની નદીઓ પર કામ ચાલુ છે. ચારેય સ્ટેશનો પર કામ ઝડપથી ચાલી રહ્યું છે તેમજ BKC થી શિલફાટા સુધીની 21 કિમી લાંબી ટનલ પર પણ કામ ચાલુ છે. પાલઘર જિલ્લામાં કુલ 7 માઉન્ટેન ટનલ પર કામ ચાલી રહ્યું છે.

MAHSR પ્રોજેક્ટ લગભગ 508 કિલોમીટર લાંબો છે, જેમાં 352 કિમી ગુજરાત અને દાદરા અને નગર હવેલીમાં તથા 156 કિમી મહારાષ્ટ્રમાં આવેલ છે. આ પ્રોજેક્ટ આર્થિક પ્રવૃત્તિઓને પ્રોત્સાહન આપશે, જ્ઞાન હસ્તાંતરણને મજબૂત બનાવશે અને નવા ઔદ્યોગિક અને આઈટી હબના વિકાસમાં મદદરૂપ બનશે.

27 જાન્યુઆરી 2026 સુધીમાં લગભગ 334 કિમી વાયાડક્ટ, 17 નદી પુલ અને 12 મુખ્ય ક્રોસિંગ (રાષ્ટ્રીય માર્ગ, રેલવે વગેરે) પૂર્ણ થઈ ચૂક્યા છે. ગુજરાત વિભાગમાં ટ્રેક બિછાવટ અને વિદ્યુતીકરણનું કામ ઝડપથી આગળ વધી રહ્યું છે.